Песнь 6 — Покаянный ко Пресвятой Богородице

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Пресвятая Богородице, спаси нас.

Житие мое блудно, душа моя сквернава, и живот весь окаянен, тело же мое все во злых люте окалях: темже потщися Дево, помози ми.

Пресвятая Богородице, спаси нас.

Конец предста, и не теплю, Благая, совесть обличает мя: предстоят бо ми деяния лукавая, и житие блудное, и судища ужасаюся Сына твоего, Чистая.

Слава Отцу, и Сыну, и Святому Духу. Плоти моея разжжение, река огненна страшна и неугасима ждет воистинну, и червь неусыпаяй: но угаси ми сия молитвами твоими, Пречистая.

И ныне, и присно, и во веки веков, аминь. Ныне трепетом одержимь есмь, Благая, и ужасаюся лукаваго ловления: прежде бо конца хощет мя тлитель убити, держа мя яко пленена всего, и нага добродетелей.

Господи помилуй (трижды). Слава Отцу, и Сыну, и Святому Духу, и ныне, и присно, и во веки веков, аминь.