Песнь 4 — Покаянный ко Пресвятой Богородице

Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.

Пресвятая Богородице, спаси нас.

Ангельстии чинове, и воинства небесных сил, твоего Сына ужасаются державы, Чистая: ныне же аз отчаявся, безстрашием одержимь есмь.

Пресвятая Богородице, спаси нас.

Удивися вся земля и ужасеся зрящи, лютая и злая творящу ми, и безместная: и твоего Сына многому милосердию чудится.

Слава Отцу, и Сыну, и Святому Духу. Церковь осквернив зле телесную, и Церковь Господню, в нюже человецы трепещуще входят, аз же блудный без студа вхожду: увы мне.

И ныне, и присно, и во веки веков, аминь. Не яви, Владычице, не яви странна мя устраншася крова Сына твоего, всяко недостойнаго: но омый мене от скверны прегрешений моих.